लोकसेवा आयोगलाई पुनःसंरचनाको आवश्यकता

प्रभाषचन्द्र झा ,
विराटनगर, चैत २ गते  । मुलुक सङ्घीय प्रदेशमा गइसकेकाले लोकसेवा आयोगको पुनः संरचनाको आवश्यकता महशुस गरिएको छ ।
लोकसेवा आयोगद्वारा आज विराटनगरमा आयोजित सार्वजनिक प्रशासन सुधारमा लोकसेवा आयोगको भूमिका विषयक अन्तरक्रियामा सो आयोगका पदाधिकारीद्वारा सो धारणा प्रकट गरिएको हो ।
मुलुक सङ्घीय प्रदेशमा गइरहेको अवस्थामा लोकसेवा आयोगलाई निर्वाह गर्नुपर्ने भूमिकाका साथै आयोगलाई अझ विश्वसनीय बनाउनुपर्ने, केन्द्रीय र प्रदेशको लोकसेवाबीच समन्वय हुनुपर्ने,कर्मचारीको दक्षतामा अभिबृद्धिका लागि पहल गर्नुपर्ने, आरक्षण निश्चित अवधिको लागि हुनुपर्नेलगायतका सुझावहरु सहभागी कर्मचारीहरुले प्रकट गरेका थिए ।
सो अवसरमा लोकसेवा आयोगले लहान,हुम्ला र डोल्पामा परीक्षा केन्द्रको स्थापना गरेको, परीक्षा र काँपी जाँचलाई विश्वसनीय बनाउनका एउटा काँपीलाई दुईजना शिक्षकद्वारा जाँच गराउने गरिएको, दोहोरो काँडिङ्ग गर्ने गरिएको,आँनलाइनबाट फारम भर्ने व्यवस्था गरिएको लगायतका विषयमा सो आयोगका पदाधिकाद्वारा जानकारी गराइएको थियो ।
यसका साथै,लोकसेवा आयोगलाई निवृतिभरण पाउने कर्मचारीको सङ्ख्या प्राप्त नहुने गरेको,कार्यालयहरुमा रिक्त दरबन्दीको समयमा जानकारी नआउने गरेको, करार र अस्थायीमा कार्यरत कर्मचारीको जानकारी नआउने गरेको,निजामती कर्मचारीको दरवन्दी अद्यावधिक नहुने गरेकालगायतका विषयमा आयोगका पदाधिकारीले गम्भीर चासो प्रकट गरेका थिए ।
सो अवसरमा लोकसेवा आयोगका सदस्य विन्दा हाँडाले लोकसेवा आयोगको विश्वसनीयतालाई गुम्न नदिनका लागि परीक्षा प्रणालीलाई अझ बढी परिष्कृत गरिने बताउनुभयो ।
लोकसेवा आयोगका सहसचिव लक्ष्मीनिवास कोइरालाले आयोग सार्वजनिक प्रशासनको अभिभावकरहेको चर्चा गर्दै आयोगको काम,कर्तव्य र अधिकारलगायतका विषयमा प्रकाश पार्नुभएको थियो ।
प्रमुख जिल्ला अधिकारी तोयम रायले कार्यक्रमको अध्यक्षता गर्दै कर्मचारीहरुलाई पहाडी जिल्लाहरुतर्फ बसाइका लागि आकर्षित पार्नका निर्धारित नितीमा सुधार गर्नुपर्ने आवश्यकतामा जोड दिनुभयो । रासस