बन्दकर्ताले तीनवटा गाडी जलाए,एकको मृत्यु

परासी, ३१ साउन । नवलपरासीको बासाबसहीमा बन्दकर्ताहरुले आज बिहान तीनवटा गाडी जलाएका छन् । पूर्वपश्चिम राजमार्गअन्तर्गत बर्दघाट–सुनवल सडकखण्डको तिलकपुरको तुलसीनगरमा बन्दकर्ताले दुईवटा ट्रक र एक पिकअप भ्यान जलाएका हुन् ।

बन्दकर्ताले ना३ख ६९२६ नं को ट्रक र बा१०च ३३१३ नंको
पिकअप भ्यान र नम्बर नखुलेको एक ट्रकसहित तीनवटा गाडी जलाएका छन् ।

त्यसैगरी बन्दकै क्रममा गाडी पल्टिँदा नम्बर नखुलेको ट्रकका चालक रविलाल गुरुङको मृत्यु भएको जिल्ला प्रहरी कार्यालय नवलपरासीले जनाएको छ ।

नवलपरासीमा लगातार एक सातादेखि थरुहट मधेसी संयुक्त सङ्घर्ष समितिले बन्द आह्वान गरेका छन् ।