केही सातादेखि नकारात्मक असर परेको नेप्सेमा यो साता पनि पहिलो दिनको तुलनामा ५.५२ अङ्कले घटेको छ । यो साताको अन्तिम दिन एक हजार ९४.५७ अङ्कमा पुगेको नेपाल स्टक एक्सचेन्जले जनाएको छ । यस साता स्टक एक्सचेन्जमा १४३ कम्पनीका चार ८६८ कारोबारबाट रु ७५ करोड ८२ लाख ३३ हजार बराबरका १५ लाख ८७ हजार ३९० कित्ता सेयर खरिद बिक्री भएका छन् ।‘क’ वर्गका कम्पनीको कारोबार मापन गर्ने सेन्सेटिभ इन्डेक्स पहिलो दिनको तुलनामा १.०८ अङ्कले घटेर २३६.२६ अङ्कमा आइपुगेको छ । यस साता कारोबार रकमको आधारमा एभरेस्ट बैंक अग्रस्थानमा रहेको छ । त्यसैगरी कारोबार भएको सेयर सङ्ख्याको आधारमा बिजनेस युनिभर्सल डेभलपमेन्ट बैंक अग्रस्थानमा छ । त्यसैगरी कारोबार सङ्ख्याको आधारमा वरुण हाइड्रोपावर कम्पनी अग्रस्थानमा रहेको छ ।
यस साता नेपाल स्टक एक्सचेन्जको कारोबार कक्ष नियमित कारोबारका लागि चार दिन खुला रह्यो । यस साता पनि ऋणपत्रतर्फ संस्थागत तथा सरकारी ऋणपत्रको कुनै पनि कारोबार भएन । यो साता छिमेक लघुवित्त विकास बैंकको १४ लाख १८ हजार ५५७ कित्ता र लक्ष्मी बैंकको ७० लाख १३ हजार ६०६ कित्ता हकप्रद सेयर सूचीकृत भएका छन् ।
Post a Comment