मोर्चाको माग सम्बोधन भए मुलुकले निकास पाउँछ– नेता गुरुङ

फलेवास (पर्वत), २६ पुस । नेकपा क्रान्तिकारी माओवादीका पोलिटब्युरो सदस्य देव गुरुङले मधेसले उठाएका माग सम्बोधन गर्नसके मुलुकले तत्काल निकास पाउने बताउनुभएको छ ।
मोर्चाले राखेका माग जायज रहेको भन्दै तत्काल मधेसका माग सम्बोधन भए मुलुकले निकास पाउने आज पर्वत सदरमुकाम कुश्माबजारमा अयोजित पत्रकार सम्मेलनमा बताउनुभएको छ । मोर्चाका मागप्रति सरकारले खासै चासो नदेखाएका कारण तराईको आन्दोलन र भारतीय नाकाबन्दी लम्बिँदै गएको उहाँको भनाइ रहेको छ ।

तराई मधेसमा आन्दोलनरत पक्षसँग वार्ता गरेर सहमति गर्न सरकारले कुनै चासो नदेखाएको भन्दै उहाँले सरकारलाई तत्काल सहमतिको बाटोतर्फ अगाडि बढ्न आग्रह गर्नुभयो ।

सरकारमा रहेका दलको अहङ्कारबादी सोचका कारण समस्या थपिँदै गएको उहाँको टिप्पणी रहेको छ । नेता गुरुङले नाकाबन्दी अझै लम्बिए देशमा गम्भीर प्रकारको आर्थिक मन्दी हुने र नेपालको अर्थतन्त्र धरासायी बन्ने सङ्केत गर्नुभयो । यस्तो समस्या आउन नदिने सबै दल मिलेर आन्तरिक समस्याको हलका निम्ति अब ढिला गर्न नहुने उहाँको तर्क थियो ।