सरकारका काम प्रभावकारी बनाउन आफ्ना मन्त्रीलाई एमाओवादीको निर्देशन

माघ १४, काठमाडौं ।

सत्तारुढ एकीकृत माओवादीले सरकारका कामहरु प्रभावकारी र जनमुखी बनाउन आफ्ना मन्त्रीहरुलाई निर्देशन दिएको छ ।

स्थायी समिति बैठकमा अधिकांश सदस्यले सरकारको काम सन्तोषजनक नभएको गुनासो गरेपछि एमाओवादीले आफ्ना मन्त्रालयका कामलाई प्रभावकारी र परिणाममुखी बनाउने निर्णय गरेको हो ।

विगतका कमीकमजोरी सच्याउदै नकारात्मक कामहरुबाट शिक्षा लिएर अगाडि बढ्ने निर्णय भएको उपाध्यक्ष नारायणकाजी श्रेष्ठले जानकारी दिनुभयो ।

संकटको अवस्थामा मन्त्रीले जनताप्रति जिम्मेवार भएर काम गर्न नसकेको गुनासो बढेपछि एकीकृत माओवादी स्थायी समिति सदस्य तथा सरकारमा सहभागी मन्त्रीसहितको छलफलमा जुटेको थियो ।

छलफलमा उपप्रधान तथा उर्जामन्त्री टोपबहादुर रायमाझी र गृहमन्त्री शक्ति बस्नेत, बनमन्त्री अग्नि सापकोटा, सामान्य प्रशासन मन्त्री रेखा शर्मा लगायतले मन्त्रालयमा भएका कामको रिपोर्टिङ गरेका थिए ।